Close Rolls, April 1232

Calendar of Close Rolls, Henry III: Volume 2, 1231-1234. Originally published by His Majesty's Stationery Office, London, 1905.

This premium content was digitised by double rekeying. All rights reserved.

'Close Rolls, April 1232', in Calendar of Close Rolls, Henry III: Volume 2, 1231-1234, (London, 1905) pp. 135. British History Online https://www.british-history.ac.uk/cal-close-rolls/hen3/vol2/p135 [accessed 25 March 2024]

Image

Close Rolls, April 1232

Rex nobili viro et amico in Christo karissimo (fn. 1) comiti Sabaudie, salutem. Referentibus nobis priore et monachis Sancte Trinitatis Cantuarie, quibus quasdam literas transmisistis, intelleximus quod vehementer moti et perturbati eratis super quibusdam dampnis et injuriis illatis in regno nostro filio vestro super redditibus suis ibidem optentis. Ad quod imprimis vestram cupimus scire dilectionem, quod grave nobis admodum est et molestum si que dampna sustinuit in regno nostro super aliquibus reddituum suorum memoratus filius vester; quoniam, teste Eo quem non latent abscondita cordium, volumus et precepimus quod homines, res et redditus ipsius filii vestri per totum posse nostrum tuti consistant et defensi, sicut nostra dominica, et hoc satis declarabit operum subsequentium effectus. Quoniam in quibuscumque poterunt procuratores ipsius filii vestri coram nobis declarare quod aliquas jacturas vel dampna sustinuerit, hoc ita digne faciemus emendari, ablata plene restituendo et illis qui hujusmodi scelus in dedecus nostrum audebant attemptare, tam gravem penam infligendo, quod et vobis et ipso filio vestro multipliciter satisfiet in hac parte. Nec est necesse nec expedit, si placet, quod memorati procuratores exeant terram nostram, sicut fieri mandastis, quoniam quamcito quibusdam minis stolidis perterriti nobis id significassent, eos et res filii vestri in partibus Kancie in quibus tunc agebant, in plena fecimus pace consistere; nec aliquis eos postea molestavit vel molestabit, immo tuti et securi stabunt in terra nostra sicut aliqui ex nostris, quos cariores habemus. Sinceritatem (fn. 2) igitur vestram attentius exorandam duximus quatinus, siquam indignationem erga nos vel regnum nostrum vel aliquem de nostris occasione supradicta concepistis, eam remittere velitis, indubitanter scituri quod offensam vestram, ut amici nostri specialis et dilecti, cupimus et volumus modis omnibus devitare, et ea desideranter facere que debeant amicitie vestre complacere. Teste me ipso apud Westmonasterium, xx. die Aprilis.

Footnotes

  • 1. Blank left in MS. for initial.
  • 2. Sciteritatem, MS.