Extracts From the Records of the Burgh of Glasgow Vol. 1, 1573-1642. Originally published by Scottish Burgh Records Society, Edinburgh, 1914.
This free content was digitised by double rekeying. All rights reserved.
2 December 1598. (fn. 1)
The bailleis and counsale, onderstanding ane number of salt coft for the commonetie lyand ontane of the mercheantis handis, and thairthrow is in perell of tynsall, quhilk man be payit to the mercheantis quhomefra the same was coft, thairfor it is statute and ordanit that gif ony frieman of the toun, being chargeit be the drum and thairefter particularle to cum and resave thair salt efferand to the quantite as salbe sett dovne in roll, cumes nocht to resave the same, that thai and ilkane of thame salbe chargeit in warde, thairin to remane quhill thai pay the price of sa mekill as salbe appoyntit to thame, and the perrell to ly vpon thame for releif of the towne, and the salt to be bestowit to ane commone vse.
16 December 1598.
The bailleis and counsale ordanes William Quhytlaw to paye yerle to the thesaureris of the towne in tyme cuming vj s. viij d. for the annuell of his steip trocht and wolt biggit be him wpon the commountie, or ellis to tak dovne the same agane, and to big na farder for staying of the passage.
The bailleis and counsale present convenand appreives ane act and statute maid vpon the 7 of Februar 1597 anent the aill, eikand that gif ony persoune offenderis of brewstares, being convict in jugement for transgressing of the act, salbe chargeit to remane in warde, and nocht relevit furth thairof quhill thai find cautioune to observe the statutes thairefter, and nocht to contraveine the same vnder the paine of ten lib. ilk falt, and the ane half thairof to be applyit to the provest and bailleis, and the vther half to the commone work of the towne, and to begyn and persew the browstares on Tysdye nixt for the first court.